|
Torsdag før påske feira tilsette, elevar,
foreldre og bygdefolk at Haramsøy skule er 50 år. På ungdomsskulen var
det rigga til med biletutstilling som fortalde om utviklinga frå 1959 og
fram til våre dagar. Vidare var det kafé for gjestar som vart
kaffitørste og til slutt ei særs vellykka festframsyning i
samfunnssalen. Vi tilsette er stolte av å ha så mange flinke og positive
elevar, så mange hjelpsame foreldre og ikkje minst bygdefolk som stiller
opp og viser interesse for det skulen står for i dag. Det viser at
skulen har greidd å utvikle seg i takt med tida.
Tre grendeskular
Rektor Knut Åkre orienterte kort om skuleutvikinga på øya vår. Før 1959
var det tre grendeskular, på Ulla, på Austnes og på Åkre. Betre
kommunikasjonar og auka krav til bygningsmasse og innhald i skulen,
gjorde at tanken om ein felles skule vaks fram. Den nye skulen Haramsøy
skule på Austnes stod klar til skulestart hausten 1959. Då hadde skulen
98 elevar frå Haramsøya. I dag har skulen om lag same elevtalet med
elevar frå tre øyar.
Prolog frå opningsfesten i 1959
Opningsfesten i 1959 vart teken opp på lydband. Det har Knut Ulla
digitalisert. Han introduserte sjølv faren, Johan B. Ulla, sin prolog
som vi fekk i originallyd og med tekst på storskjerm. Guttorm Ulla heldt
kåseri med der vi fekk innblikk i skulen både før og no. "I ein god
skule er det ikkje berre dei flinkaste og best som vinn. I ein god skule
er alle vinnarar. Dette er noko Haramsøy skule har jobbar med jamt og
trutt," understreka kåsøren.
Haramsøy skulekorps
Ein stor del av elevane er med i Haramsøy skulekorps som også
samarbeider årleg med Haramsøy barneskulen om temakonsertar.
Barneskulekoret og solistar frå korpset og bygda står for songen,
korpset for musikken. Publikum fekk nyte smakebitar frå konserten
tidlegare i år der temaet var "Grease". Snakk om songglede og musikalske
perler! Når vi i tillegg fekk besøk av sjølvaste Oddgeir Bruaset (Odd
Einar Molnes) som fortalde om Lars Ulla si strabasiøse ferd i robåt frå
Ulla for å kome på skule på Austnes, kom gapskratten fram! Nesten betre
enn originalen!
Mange å takke
Rektor Knut Åkre hadde mange å takke etter festen. Leiar i FAU, Torleiv
Austnes, fekk velfortente blomar som representant for svært imøtekomande
foreldre. Elevrådsleiar Maria Ulla tok imot ein sjekk på ti tusen
kroner, jubileumsgåve frå Sparebanken Møre. "Pengane skal brukast til
trivselstiltak ved skulen," understreka Beate Tomren. Dermed enda ein
vellykka fest, fint balanserande mellom høgtid og humor, og med både
tidlegare og noverande elevar i fokus.
|
