Sist fredag fekk elevane i sjette og sjuande
klasse oppleve ein skuledag utanom det vanlege. Klasserommet var
fiskebåten "Havung", og lærar var den kunnskapsrike og alltid like
entusiastiske Arne Tunheim. Til dagleg arbeider Tunheim med maritim
utdanning på Volsdalsberga i Ålesund, og "Havung" er opplæringsbåten som
studentane bruker. Det årlege tilbodet med "Havung" er svært populært
mellom elevane våre som har gledd seg lenge til turen. Dei siste vekene
har vi arbeidd med livet i havet for å førebu oss godt til turen.
Medan skipper Per set kurs mot garnlenkja i Longvafjorden, har Arne
Tunheim eit lynkurs i fiskeri, økologi og verdiskaping for elevane.
"Veit dokke kva vi langs kysten skal leve av når olje- og gasseventyret
tek slutt?" Og elevane hugsar litt frå turen i fjor. "Fiskeri!" Svaret
kjem kjapt. Og Tunheime nikkar: "Ja, fiske, havbruk og produksjon av alt
utstyret som skal til for å hauste rikdommane frå havet."
Og så er det vår tur til å hauste av rikdommane i Longvafjorden. Spelet
startar, garnstrengen halast inn famn for famn, så dreggen og til slutt
garnet. Er det fisk å sjå? Blenkje det kvitt langt der nede? Der er ein
fisk!! Og ein diger tare!! Sjå!! Ivrige hender peikar. Garna kjem inn,
meter for meter. Og fangst blir det. Hyse, torsk, makrell, kolkjeft,
korstroll og krabbe. Flinke elevar greier garn og bløggar fisk så gørr
og sveitte driv. Etterpå er det naturfagtime rund kassa med fangst.
Tunheim sprettar fisk og fortel kva dei ulike delane av innvollane
heiter: Lever, milt, tarm, magesekk, rogn og blindtarm. Vi studerer
augelinsa og ser at biletet i linsa faktisk er opp ned. Hjerna vår snur
biletet rette vegen. Til slutt blir fisken til fine filetar som skal bli
lekre rettar på skulekjøkkenet i tida som kjem.
På veg mot land blir det servert mat. Lekker fiskesuppe, sjølvsagt. Og
det smakte svært godt, for snart var den dampande gryta tom. Om det var
kjekt? Og lærerikt? Jaaaaa, kom det unisont frå elevane. Tusen takk for
turen, Arne!!!
|
