Vi tok turen over Haramsskaret til ungdomshuset på Haram. Der venta ei lita overrasking. Kathrine og Anders hadde laga klar varm og god tomatsuppe. Det gjorde godt etter ein lang fottur. I urane ovanfor den gamle fotballbana veks hassel og andre varmekjære treslag godt i den solrike og godt skjerma fjellsida. Etter ein liten og forsiktig klatretur i ura, nådde vi målet. Hasselbuskene var fulle av nøtter. Og elevane plukka og plukka. Så var det å finne ein liten stein og knuse nøtta forsiktig. Innhaldet var kvitt! Underleg! Men jammen var det godt. Vi måtte forklare at innhaldet i ei ung nøtt er kvitt.

Så måtte det plukkast meir. "Eg vil ha med litt heim så mamma og pappa også får smake!" Etter kvart vart det store buler på lommene. Og diverse holrom i sekkane fekk innhald. At vi møtte regn og vind på veg heim, brydde ingen seg om. Tankane krinsa om "presangane" i lommer og sekker.