Fellestur til Lepsøy

Skulane på Flem, Haramsøy og Lepsøy samarbeider i nettverk for å skape gode læringsmiljø for elevane sine. I dette arbeidet ser skulane det som viktig at elevane blir kjende med kvarandre så tidleg som råd sidan dei skal gå i lag på ungdomsskulen. Felles møtestadar er ein viktig del av dette arbeidet.
 

Tidlegare i år har elevane på mellomsteget hatt tur i lag til Haram på Haramsøya. Sist veke var det fellestur til Lepsøya med tur til Rønstadhellaren. Der fortalde to flinke elevar frå Lepsøy skule fakta om hellaren. Elevane kosa seg med god grillmat og dagen vart avslutta med fotballkamp i den nye, fine ballbingen ved Lepsøy skule. Slik blir elevane kjende både med naboøyane og kvarandre.

Kultursti på Lepsøya
Lepsøya er rik på natur og kulturopplevingar og byr på ein kultursti utanom det vanlege. Turen tek omtrent tre timar om ein ikkje tek for lange pausar, men her er så mykje å sjå på at ein heil dag bør setjast av. Startar ein turen rundt Lepsøya frå garden Rønstad kjem ein fyrst til den kjende Rønstadhellaren. Hellaren er grove ut av havet og er heile 90 meter lang og 13 meter høg, ein av dei største slike hellarar i Europa.
Nedanfor Rønstadhellaren ligg Columbinebukta der Betty Mouat frå Shetland dreiv i land på seglskuta "Colombine" i 1886.
 

Her kan du lese kva Asbjørn Oterhals har skrive om Betty Mouat og ”Columbine”: http://home.ntebb.no/arkmarin/Mouat.html

Bilete frå redninga av Betty Mouat: http://www.piratequeen.org/betty_mouat.htm

Kammen i Rønstadhellaren

På rundreisa si på Sunnmøre, kom arkeologen Anders Lorange til Rønstadhellaren i 1878. Her fann han ein eldstad og måltidsrestar, og ein vakker kam frå omkring 100 år e.Kr, som var "forsigtigt indstukket i et lidet mellem tre Stene dannet Rum".
Kammen som Lorange fann, var laga av eit heilt stykke. Den var spesielt utforma, med utskjering frå begge sider. Som dekor er kammen påført sju punktsirklar. Sjølv om kammen ber preg av slitasje på tennene, er den godt bevart.

Kjelde: Fylkesarkivet Møre og Romsdal