Ja, vi vil danse:
På tvers av skular og klassetrinn!
 

- Veldig spent på førehand, men no går det berre fint! Dette er uttalar frå 7. klassingane som er på dansebesøk på ungdomsskulen denne veka. Alle 7.-10.klassingar på Lepsøy, Haramsøy og Flem skule dansar seg sveitte og smørblide med alt frå swing, polka, zumba, seksmannsril og ”ferjedansen”.

Ungdomsskulen på Haramsøy har elevar som soknar frå Lepsøy, Flem og Haramsøy barneskular. 7. klassingane frå dei nemnde skulane blir invitert til dette prosjektet, som går over tre dagar.  – Alle elevane er med, gler seg til dette, og dans er kjempegod aktivitet i forhold til at elevane blir kjend med skulen dei skal byrje på neste haust på ein positiv måte, seier Sigrun Rogne, lærar og mangeårig dansegeneral på skulen.

Elevane instruerer
Rogne er instruktør på dei fleste dansane, men elevane er også dyktige bidragsytarar. 10.klassingane Ida Seth Davik og Ane Buner fekk med seg alle 70 elevane og lærarar på zumba. I tillegg brukar Rogne elevane mykje som førebilete og instruktørar i alle dansane.

- Berre artig
- Er ikkje dette skummelt, og kome på ein ny skule og ”måtte” danse?
- Definitivt, svarar Anders frå Haramsøy. Men no er det berre kjekt, seier han etter andre dansedagen. – Ikkje så veldig skummelt, vi kjenner dei fleste frå før, meinte Hanne frå Flem. – Litt spent før vi kom, men no er det berre kjekt, fortel Marius frå Flem. Dei tre karane Elias, Henning og Sander frå Lepsøy meinte at dansinga er sånn bob-bob, men at dei ikkje gruer seg på nokon måte. - Veldig kjekt å treffe dei andre 7. klassingane, og bli kjend med ungdomsskulen vi skal på til neste haust, sa Henning.